Friday, August 17, 2007

عربية كارو



سقطت الياء عمداً من كايرو

عربية كارو كلها خشب.. حتى عجلها خشب.. تم تقطيعه ببلطة وتجميعه ليكوّن فى النهاية كارو. ضربة البلطة سايبة علامة فى كل مكان لمسته ولون الكارو لون الخشب بعد فعل الزمن

كانت فى ميدان رمسيس.. مُحمّلة بكل شىء وبيجرها حمار
حمولتها كانت كبيرة على الحمار وماكانش قادر يقوم بيها تانى بعد ما وقفت فى إشارة مرور


العربجى كان زى الثور الهائج مش عارف يعمل إيه

الكل وراه متعطل والحمار مش قادر يجر الكارو.. ورطة
إبتدى يرمى الحمولة حتة حتة لعل وعسى
لكن مافيش فايدة.. الكارو كانت تقيلة كبيرة خشبها ضخم وحمولتها كبيرة

راجل مُسن واقف جنبى قال.. الحمار تعبان محتاج يرتاح
قال إنه عنده محل فى المنطقة وشاف الكارو دى معدية من كام سنة

سألته ليه الحمار المرة دى مزرجن؟
قال إن الحمار ده مختلف عن اللي شافه قبل كده بيجرها
ده بيجر على سطر ويسيب عشرة والحمولة بتقع بسببه على الأرض

قلت يعنى مش المفروض كارو كبيرة كده يجرها حمار
قال صح.. المفروض فرس يجرها
قلت بغل أحسن.. إلى أن يتم العثور على الياء التى سقطت
إستغرب.. لكن لما عرف ميزة البغل على الحمار والفرس رحّب
البغل أصله نتاج تزاوج فرس وحمار وبيجمع من الإثنين كل ميزة.. وزيادة
وإيه هى الزيادة!؟

البغل عقيم مابيخَلفش

إيضاح: المقصود بسقوط الياء عمداً هو فقدان الهوية والذى أدى إلى تغيٌر الملامح تماماً فأصبحت كايرو (مجازاً و المراد الكل) عربية كارو لا يصلح معها غير الجر. والرجل المسن أوضح أن حمير كثيرة توارثت جرها.. فالياء سقطت من زمن بعيد. أما البغل فهو حل مؤقت لقضية التوارث البيوليجى لجر الكارو لحين إسترداد الهوية


33 comments:

tota said...
This comment has been removed by the author.
loumi said...

العزيز مدحت
تسلم ايديك
فعلا لو كان بغل كانت مشكله مين اللى حيجر كارو بعد سقوط الياء عمدا
اتحلت وما كانش يبقا عندنا الجدل
الحاصل دلوقت
تحياتي

tota said...

انا سرحت معاك فى البوست خالص
ومكنتش مركزة اتريك عامل شقاوة
بقى مش عاجبك الحمار وكنت عايز بغل

علشان ما يسيبش وراه ورثة يورثوا حمريته ويجروا كارو برده
بس هى للاسف الكارو مكتوب عليه ينجر للابد

ومع ان المفروض ممنوع اناث الحيوانات اللى من النوع ده تدخل فى عملية الجر الا ان فى تدخل واضح وصريح اذ ان انثى الحمار بتشارك فى الجر

وطبعا المستقبل مشرق للاولاد والاحفاد

الا ليته كان بغلا فعلا لكن البغل دماغه انشف كان هيقلب العربية باليى فيها بقى ما هو مفيش حد يخلو الكارو علشانه

تحياتى

عصفور المدينة said...

ميزة البغل إنه مش بيخلف وبالتالي ملوش ورثة

حــلم said...

واضح ان خالتى رمزية كانت بتزور كندا وعدت عليك
:)
المشكلة
لو كان بغل
ومالوش ولاد
الناس هتتخيل
ان الكارو هيقف لو مات
وماحدش هيعرف يجره
شفت الخيبة

Gid-Do - جدو said...

جارى العزيز

انت مش ملاحظ ان الموقف كله عبثى ـ اولا العربجى كان لازم يعرف ان زمن الكارو اصبح لايتماشى مع القرن الواحد والعشرين لان الحمولة تقيلة والكارو قديمة والحمار غير مناسب من الاساس ـ وكان العربجى لو يبفهم كان فكر فى التغير من الكارو الى عربات النقل ذات الحمولات الثقيلة وكان عمل امتحان للسواقين وانتخب من بينهم اصلح سواق عندة خبرة فى السواقة ومعرفة الطرق واستعمال الخرايط علشان يوصل الحمولة كاملة وسليمة وميقعش منها حاجة انا بلوم العربجى لانه لسة طور مش عارف وراضى انه يفضل طور ـ الكارثة الكبيرة ان العربجية فى الحوارى اللى جنبة تطوروا مع الزمن ولحق كل واحد منهم يشترى عربية نقل بيتعلم عليها وحتفظل الكارو زى ما هية لان العربجى صاحبها مصمم يفضل بيفكر زى الطور ـ تحياتى

مجهول said...
This comment has been removed by the author.
مجهول said...

ههههههههههههه
يا ايها الشقي الخطير

البغل انا شايف احسن فعلا علي الاقل مش بيخلف واجمد من الحمار

يا مراكبي said...

صقفة جامدة جدا جدا

الياء سقطت عمدا بالفعل بسبب إصرار العربجي على إن الحمار العجوز يفضل سايق الكارو التقيلة دي طول المدة الكبيرة دي من غير ما يآخد باله إنه خلاص عجز وبيناطح في سنة الحياة

أحلى حاجة قلتها هي عشوائية تصنيع الكارو كمان

والأحلى والأحلى حكاية البغل دي .. ساعتها هيبقى المثل بيقول إن اللي خلف .. مات

عزيزي: إلى أن يتم العثور على الياء فلتظل بعيدا عن العربة الكارو ولا تعد إليها .. صدقني

عدى النهار said...

لومي.. تسلمى

هو فى جدل؟
كنت فاكر إن الأمر محسوم

عدى النهار said...

توتا

أنا برضه لما قرأت تعليقك الأول قلت إيه اللي حصل ورجعت للبوست تانى.. بصراحة شكت فى اللي كتبته
:)

أعتقد إن الكارو حاتكون خفيفة زى الريشة على وقت الأحفاد

بس أنا حقيقى مرعوب من موضوع قلب العربية باللي فيها.. ربنا يستر

عدى النهار said...

عصفور المدينة

شوف الحال بقى عال إزاى! الإختيار أصبح بين بغل وحمار.. بس ده حتى خيال

عدى النهار said...

حلم

هى كانت زيارة خفيفة سريعة بس يظهر أثرها كان باتع
:)

الحق دى تبقى خيبة تقيلة قوى. بس هو الأمل إن ولاد الحلال يبحثوا عن الياء اللي سقطت وهى ماتبقاش كارو محتاجة جر أو زأ

عدى النهار said...

جدو.. معاك

بس هو الكل عارف إن زمن الكارو إنتهى لكن الحمار واصل بحمريته وله سنيدة كتير جوه وبره واللي بيفتح بقه ويقول كفاية تنهيق إنت عارف بيحصل إيه معاه

عدى النهار said...

مجهول

أيوه يا راجل إرفع من روحى المعنوية.. كنت قربت أفقد الثقة فى إختياراتى الحيوانية
(:

عدى النهار said...

يامراكبى

هى العلة فى الياء بالظبط زى مانت قولت
لو نلاقيها ونحطها مكانها ينعدل الحال

Bella said...

الياء سقت بفعل فاعل فعلا

المشكلة ان الحمار جايب كل قرايبه ومبرطعين فوق العربية واللى قدامها واللى وراها

فلما الحمار الكبير مش قادر يجر قرايبه الحمير محوطين الكارو من كل جهة تمهيداً لرفس اي حد يفكر يجر علشان العربية تمشي

يعني يايجرها الحمار الكبير ياتفضل واقفة علشان احنا نتعب من الانتظار ونلاقي ان الحل الوحيد ان الجحش ييجي يتعلم فينا الجر

واو زقة من هنا على زقة من هنا الكارو ح يتحرك شوية

ولو مااتحركش بقى نخصخصه ونخلص ونجيب قطاع الحمير يديره
( قطاع الاعمال سابقا)

واهي الزريبة مليانة

اما بقى لو كان الحمار عمل زي الحمير المجاورين واشتري عربية نقل كان ح يسوقها هو برضه ويجيب الجحش ابنه يسوقه

يعني مافيش فايدة برضه ح تفضل الياء غايبة

امتى بقى تحصل رفسة جماعية ونتخلص من الحمار الكبير وشلته

لامؤاخذة يعني الواحد كلامه بقى حصاوي

ولو قعد شوية ح يقلب مخطط

ذو النون المصري said...

فعلا كنا محتاجينه بغل
تعرف ن فيه اشاعات في بلدنا انهارده بتقول ان الحمار مات امبارح بالليل لكن الحكومه مخبيه علي الموضوع
اه و الله الاشاعات دي سرت في بلدنا انهارده
ناس بتتمني
موضوعك جميل
تحياتي

loumi said...

هههههههههههههههه
لا
الاشاعه طلعت اشاعه
بس تخيل لو الجحش
حب يتخلص من الحمار
او العكس
مخي شطح مش كده؟
:):)

عدى النهار said...

bella

هو تم إسقاط الياء من سنين بعيدة جداً ومن ساعتها مافيش غير جر وزأ

عدى النهار said...

ذو النون المصرى

ليته يعلم مدى حب الناس له وما تتمناه له

عدى النهار said...

لومي

ماعتقدش إنهم وصلوا للدرجة دى من الإنحطاط ولا أقولك بلاش الإنحطاط لأنهم مالهومش حدود فى النقطة دى وخلينا نقول الغباء بدل الإنحطاط لأن مصلحتهم واحدة ليه يتخلصوا من بعض

loumi said...

طيب فين بقا البوست الجديد؟
مين حيديني
اجرة التاكسيات
رايح جاي
جاي رايح؟
:)

Pakinam Nasser said...

اعتقد ان الحمورية بقيت مورثة حتى لو مش عن طريق الجينات،
يعنى حتى البغل مبقاش امل و لا ينفع

عدى النهار said...

لومي

يافندم دا إحنا نبعت العربية بالسواق

الواحد إنشغل شوية بس إنشاء الله جاى فى السكة

:)

عدى النهار said...

باكينام

طب هانعمل إيه! الإختيارات المتاحة حالياً بغل أو حمار

ربنا يفرجها

loumi said...

تسلم
إن شاء الله يكون خير
تحياتي

محمود الدوح said...

فعلا احنا محتاجين بغل يجر العربية عشان الحمار تعب وهيجيب حمار احمر منة يشد الكارو
يارب ارزقنا بغلا

أُكتب بالرصاص said...

اولا احييك



ثانيا

اعتقد اننا محتاجين قبل البغل

محتاجين اننا يا نجدد العربة
يا نجيب عربية تانية احسن

لان القديمة خلاص ماعدتش نافعة


تحياتي

أُكتب بالرصاص said...

جمله اعتراضية


tota

اين أنت ؟

عصفور بلا أجنحة said...

مافيش تعليق بعد الى قالة السيد عصفور المدين
تحياتى
و مشكورة

دنــــيــــــا مـحـيـرانـي said...

الياء سقطت عمدا
تحفه يا مدحت بجد توصيف حقيقي بما نحن فيه
بس يا تري البغل هياخد العربيه و هايمشي في اي طريق
ربنا يسلم طريقنا
الكل خايف من الاي جيء
و يا خوفي نترحم علي ايام الحمار و نلعن ايام البغل المنتظر اي كان من البغل
تحياتي

بنت القمر said...

بس يا خوفي يجي لنا حمار احمر من اللي قبله ونقول ما كان حمارنا نعمه ايه خلانا نستحمر ونجيب حمار غيرة؟؟؟ فهمت حاجه؟؟؟ تحياتى