Wednesday, August 1, 2007

تاج



وصلني هذا التاج من بيلا والحق ماعرفتش أو بمعنى أدق إتكسفت أتجاهل طلبها مع إن كل الأسئلة مُركبة وشكلها كده من تأليف جهة سيادية من إياهم


إسم مدونتك؟
ماله؟

لماذا اخترته ..وماهي نيتك من وراء اختياره؟
فى رأي إن كل نقطة تقاطع فى حياتنا مع حدث ما أو موقف أو شخص أو فكرة... بتأثر بشكل ما فى تحديد خطواتنا التالية

هل فكرت في إغلاق مدونتك؟ والسبب؟
المدونة شغالة 7 أيام/24 ساعة. لو قررنا إغلاقها سيتم إعلام سيادتكم بالسبب

صورتك في المدونة ورمزيتها ؟؟
هاروح أجيب صورة وآجى أجاوب

لماذا دخلت عالم التدوين من الاساس؟
كنت ماشى ولاقيت باب مفتوح دخلت.. لاقيت الجو كويس أخدت ركن وقعدت

التعليقات بالنسبه لك ,اهميتها؟
تواصل مطلوب بيعطى روح للمدونات

احلى بوست كتبته ...ضع اللينك , ثم اذكر لماذا؟
أول ماسمع كلمة أحلى بافتكر كلمات جاهين اللي غنتها ماجدة الرومى "أحلى مافى الحلق طعم المُر مالذكرى شوفوا المرار لمّا يبقى حلو ياجدعان" نرجع لموضوعنا.. أحلى بوست كتبته؟ مش عارف.. مافكرتش فى الأمر من الزاوية دى خالص

أفضل بوست قرأته؟ وضع لينكه؟
مافيش بوست واحد أقدر أقول إنه الأفضل لكن بوست
لو ندرك الحقيقة حسيت إنه وليد لحظته جداً وفيه معنى حقيقى واضح لكن يمكن كتير منا بيغفل عنه. و فى بوست آخر قديم شوية من مدونة مهمة زيارتى لها متكررة من وقت لآخر قرأته من يومين و شايف إنه بيقدم صورة ياريت الناس تستوعبها كلنا ليلى ..آه يا ليلى كفاية كده على السؤال ده لأن القائمة طويلة جداً

أفضل مدونة قرأتها؟
هى مدونات وليس مدونة واحدة. لكن عامة كلما قل التكلف فى إختيار المواضيع وطريقة صياغتها كانت المدونة هى الأفضل عندى. وطبعاً التعليقات والتعقيبات عليها بيضيفوا قيمة كبيرة للمدونة

حد قل أدبه فى التعليق إيه رد فعلك؟
ماحصلش الحمد لله وماحبش أفترض حدوثه

أسوأ مدونة؟
هو التطرف فى عرض أى موضوع بيفقد المدونة قيمتها

أسوأ بوست أسوأ مدون...............؟
صاحب المدونة السابقة

هيحصل ايه لإيميلك لما تموت ؟؟
يمكن يروح
لمقبرة الإنترنت

اديت الباسوورد لحد قبل كده؟
لأ

كانت إيه طبيعة علاقتك بيه؟
ليه الإفتراض إنه حصل وإديت الباسوورد لحد؟

اسمك؟
مدحت

المشهور بيه وسط اصحابك؟
مدحت

شخصيتك نوعها إيه؟
نوعها إيه إزاى يعنى؟ يمكن أكون نيمكى شوية أحياناً

السفر بالنسبة لك؟
سين فاء راء

وقت فراغك بتعمل فيه إيه؟
باعمل فيه حاجات فارغة

المود بتاعك؟
دلوقتى؟ مندهش من الأسئلة بصراحة وقربت أطق :)1

الاكلة المفضلة؟
الأكل الخفيف عامة

الصفات اللي أخدتها من بابا؟
قليلة جداً.. هو الوالد الله يرحمه توفى وأنا فى إعدادى وكان مريض قبل ذلك لفترة و بالتالى ماكانش في فرصة كافية للتفاعل

الصفات التي أخدتها من ماما ؟
الوالدة الله يرحمها توفت وأنا فى الجامعة فالحمد لله أخذت منها كتير. هو فى الآخر الصفات المكتسبة من الأب والأم على أهميتها الشديدة بتفضل مكون مهم جداً فى الشخصية لكن الإنسان أمامه سنين قصرت أو طالت وظروف وتغيرات بتكسبه ، قصراً أو إختياراً ، صفات أكثر ويمكن تختلف كتير عما إكتسبه من الوالدين

اكتر ست حاجات بكرهها؟ أنا هافترض إن المقصود هنا صفات
هو أنا أكره جداً التجبٌر على الخلق واللوع والجليطة وتمركُز التفكير حول النفس والجرأة اللي فى غير محلها

اكتر ست حاجات بحبها؟
البساطة والإحساس بالنعمة والشكر عليها والإحساس بالغير والإحساس بالمسؤلية والإعتدال فى كل شىء

الشغل بالنسبة لك؟
نعمة كبيرة ربنا يديمها علينا

الانترنت بالنسبه لك؟
عرض مستمر

امرره لمين ؟ وحان وقت التدبيس
أنا مش غاوى تدبيس حد وبالتالى التاج ده هايفضل هنا واللي عايزه يتفضل مشكوراً يشيل من غير إستإذان

17 comments:

مجهول said...

كلام جميل بس فعلا ليه مش حاطط صورة للمدونة؟؟
انا اطالب من هذا المنطلق الحيوي الهام انك تحط صورة للمدونة

ههههههه

والتاج ده مش حشيله .. متشكر

تحياتي ودمت بخير وسعادة

حــلم said...

علشان تكتمل الصورة كان لازم اقرا التاج
معرفة الانترنت الافتراضية بتخلق نوع جميل من الصداقة بين البشر
اتمنى ان يديمها الله
اجاباتك حلوة
بس واضح انك كنت زهقان فعلا
:)
ربنا ما يوقعك بين ايدين وكيل نيابة
أبـــــداً
:)

عصفور المدينة said...

ما خدتش ركن وقعدت ولا حاجة حضرتك متفاعل جدا
ربنا يديم عليك نعمه
على فكرة محسوبك صاحب عبارة حان وقت التدبيس ومشسيت مع التاج وده خلى الناس مش تمرره لحد
باضحك لما باقراها
ربنا يديم عليك نعمه

عدى النهار said...

مجهول

هو فى خطة خمسية لتبيض البلوج وإستجابةً لدعوتك التى لا أستطيع رفضها سيتم البحث عن صورة للبلوج
(:
حد برضه يرفض يشيل التاج السكرة ده! شيل يا راجل أحسن ماتلاقيه جايلك على غير معاد
(:

شكراً على كلماتك الطيبة وأتمنى لك كل خير

عدى النهار said...

حلم

والله إنتِ إنسانة أميرة وكلك ذوق.. لو الواحد قاعد مع صاحب له وبيحكى الكلام الكتير اللي فى التاج كان الصاحب ده قاله خلّص
:)
أتفق معك فى الرأى وأقول آمين

من ناحية إنى كنت زهقان فكنت إلى حد ما.. أصل الأسئلة كانت كتيرة شوية
وربنا يستر علينا جميعاً من وكلاء النيابة إنترنتياً وحياتياً
(:

عدى النهار said...

عصفور المدينة

تُشكر يا صاحبى على الدعاء الجميل وربنا يديم نعمه على الجميع

إنت بأه يا أستاذ مبتدع عبارة التدبيس.. ماشى نفوتها المرة دى عشان خاطرك ولو إنها موأفة سوق التاجات

(:

anawafkary said...

اجابتا جميله قوي

محددة .... معبرة ... مختصرة ....موحية

تحياتي

يا مراكبي said...

شكلك زهقت بسرعة مع أول تاج

أحب أقولك إن من كتر التيجان اللي بتوصل لي فكرت كتير أفرد ليها مدونة مخصوصة

تحب أبعت لك شوية من اللي لسة ما رديتش عليهم؟

هههههه

عدى النهار said...

عمرو

أسعدنى أنك وجدت فى الإجابات شىء موحى

قرأت موضوعك عن الباب الذى لايريد أن ينفتح. الموضوع كان مكتوب بطريقة جميلة.. عجبتنى فعلاً طريقة السرد وواضح إن الأفكار خرجت بتلقائية يمكن بحكم إن جزء أساسى منها حدث فى الليلة السابقة لكتابة الموضوع. جميل إن الواحد يقدر يعبر عن أفكار مختلفة فى حيز صغير مثلما فعلت. خاصة حكاية كل واحد من العشرين صاحب اللي قابلتهم وإزاى الحياة أخذتهم فى إتجاهات مختلفة وإن كان جمعهم البحث عن مستقبل ناجح.. لا أتخيل شىء آخر ممكن يجمع خريجين جدد

أنا قرأت موضوعك عند نشره ولم تأتينى فرصة التعليق عليه قبل غلقك للدكان الجميل :) بصراحة مدونتك كانت جميلة وأمر إغلاقك لها يستحق المراجعة

على العموم جزء من اللي كنت عايز أقوله هو إن الفترة الي الواحد بيعيشها من حياته وهو حاسس إنها منقطعة عن ماضيه ومستقبله زى فترة الجيش بيكون من الصعب رؤية الأمور بوضوح من خلالها

أتمنى لك التوفيق وعلى الأقل ماتحرمناش من تعليقاتك إلى أن تعود للتدوين ثانية
(:

anawafkary said...

مدحت

لقد أعطيت للدكان معني

:)

لقد فكرت فيك شخصيا كثيرا قبل الإغلاق ...فكرت أن اكتب موضوعا اليك شخصيا

بجد أشعرتني بمشاركة وجدانيه شديدة و أحببت هذا الشعور جدا

سأكون ان شاء الله دوما متابعا لمدونتك و معلقا عليها

و ليكن التوفيق دوما حليفك

عدى النهار said...

يامراكبى

وحياتك هو أول وآخر تاج

بس فكرة المدونة المخصوصة للتاجات فكرة حلوة.. تقدم يا رجل إنت أدها وأدود

loumi said...

العزيز مدحت

مش فاهمه من صاحب فكرة التاج ده
يمكن زى ما انت بتقول
:):):)


تحياتى

عدى النهار said...

لومى

هو أنا ماعرفش الفكرة قديمة قد إيه. يعنى ممكن إنها وقت نشأتها كانت مناسبة وجميلة

بس لو تم تطويرها شوية هاتبقى حلوة.. علشان ماتبقاش تدبيسة يعنى
(:

Epitaph said...

did you escape the tags thing wala eh? :))))

عدى النهار said...

Epitaph

I thought I did, but I was caught at the end.

You are very welcome to carry the one sitting here in my blog. It's free of charge :)

محمود الدوح said...

كلام جميل كلام معقول
وكلام سياسى بحت

بس بجد الردود جميلة مع انها دوبلوماسية

عدى النهار said...

محمود

ياااه.. سياسى بحت!! لا أعتقد