Sunday, July 1, 2007

إختراعات


شاهدت فقرة فى التلفزيون إنهاردة عن الشخيييير. هى كانت عن إختراع لتجنب خراب البيوت بسبب الشخير، ده بالإضافة للمشاكل الصحية الأخرى الناتجة عن الشخير... حسب المذيع يوجد حوالى 100 مليون مشخراتى فى أمريكا وكندا. صاحب الإختراع جرَّب وسائل غالية وصعبة فى إستخدامها قبل ما يتفتق ذهنه النيّر عن قميص ضد الشخير. الفكرة جاءت له بعد ما جرب وضع كرة تنس على ظهره لتمنعه من النوم على ظهره وبالتالى لا يشخر

موضوع الكرة ده ماكنش سهل بالنسبة له فقام بعمل ثلاثة جيوب فى ظهر قميص ووضع فى كل جيب قطعة من الفوم المستخدم فى العزل. ده كان حل مناسب جداً بالنسبة له وشجعه لعمل موقع على النت يبيع فيه القميص الواحد بـ ....... 33 دولار

التلفزيون الكندى عمل معه فقرة مدتها 2:10 دقيقة وكانت دعاية مجانية لإختراعه البسيط والموقع الخاص به على النت

لا أقصد عقد مقارنة بين هنا وهناك ولكنها فقط المصادفة

قبلها بيوم واحد قرأت على موقع "المصريون" خبر مش جديد لكنه كالمعتاد كان يغُم... رفض مكتب براءات الاختراع بأكاديمية البحث العلمي 1542 طلب براءة اختراع خلال الفترة من يناير 1999 وحتى ديسمبر 2006، بسبب عدم سداد الرسوم المقررة عليها والتي قد تصل في بعض الأوقات إلى نصف مليون جنيه


27 comments:

عازف الناى said...

الاصفار الكتير اللى امام ال33 دولار خلتنى اجرى على اللينك الموجود تحت كلمه حل والحمد لله لقيته ب32,99 دولار
عموما دى اول زياره لى عندك
اسجل اعجابى بالمدونه
قبل ما امشى احب اضيف ان الرسوم المقرره على براءه الاختراع خلتنا نستورد كل حاجه حتى اعواد الكبريت
وشكرا

عصفور المدينة said...

لا يمكن أن يكون هذا السلوك عشوائي سواء منهم أو من جماعتنا
منهجية تشجيع البحث العلمي كهدف
وتدمير البحث العلمي كهدف مأجور

حــلم said...

عادى جداً ان دى تكون نتيجة المقارنة بين حد بيبنى وحد بيهد

الحقيقة اننا زفت

والحقيقة الاكتر انى ماكانش مفروض اعلق وانا سوداوية النظرة كدة دلوقتى

An Egyptian in the UK said...

عزيزى عدى النهار

المثل بيقول "هم يضحك و هم يبكى" و

الهم الذى اضحكنى
"يوجد حوالى 100 مليون مشخراتى فى أمريكا وكندا"

و الهم الذى ابكانى

"رفض مكتب براءات الاختراع بأكاديمية البحث العلمي 1542 طلب براءة اختراع خلال الفترة من يناير 1999 وحتى ديسمبر 2006، بسبب عدم سداد الرسوم المقررة عليها"

مع خالص تحياتى

.:.-=- ELGaZaLy-=-.:. said...

قبلها بيوم واحد قرأت على موقع "المصريون" خبر مش جديد لكنه كالمعتاد كان يغُم... رفض مكتب براءات الاختراع بأكاديمية البحث العلمي 1542 طلب براءة اختراع خلال الفترة من يناير 1999 وحتى ديسمبر 2006، بسبب عدم سداد الرسوم المقررة عليها والتي قد تصل في بعض الأوقات إلى نصف مليون جنيه
------------------------------------
تعرف ان فى اكثر من اختراع اتباعت افكارهم لبرة لان مخترعينها مكانش معاهم مصاريف للتسويق وكدة؟؟ظ

تعرف علشان كدة هما امريكا واحنا بلاد

مصر

احنا نصدر القطن ونستورد التيشرتات

بلا قرف

يا مراكبي said...

واضح طبعا إنك لا تعقد مقارنة أبدا .. ولاداعي لذلك من الأساس

إنت شايف إن الخبر المصري ده يوصف بإنه يغم بس؟ مش أكتر من يغم؟

عدى النهار said...

عازف الناى

يا راجل دى كانت أصفار عربى.. على العموم الحمد لله إنك وصلت للسعر الحقيقى

الإستيراد على الفاضى والمليان ده سبوبة كبيرة للهليبةإزاى يبقى فى إختراع بقى وقطع رزق

عدى النهار said...

عصفور المدينة

مافيش عشوائية طبعاً

أعتقد إن الأمور بعد فترة بتمشى بقوة الدفع الذاتى

عدى النهار said...

حلم

والله ماقصدتش مقارنة ومابشوفش لها معنى ليس بسبب تباعد المسافات الذى قد يوحى باليأس ولكن لأن لكل مكان ظروفه ومشاكله وبالتالى وسائله

تشرفى فى أى وقت وفى أى مود حتى لو كان سوداوى

عدى النهار said...

مصرى

كويس إنك لقيت هم يضحك :) شكراً على التشجيع

تعرف أكتر شىء بيألمنى فى الهم اللى أبكاك هو أصحاب تلك الإختراعات وخيبة الأمل اللي أصابتهم

ربنا يهون عليهم ويعوضهم خير

عدى النهار said...

الغزالى

كلامك صح. أتذكر إنى قرأت مرة عن إتفاقية عقدت بين أكاديمية البحث العلمى فى مصر ومؤسسات أمريكية تمكنت أمريكا من خلالها من وضع يدها على ما لدى الأكاديمية من إختراعات مسجلة (واخد بالك من مسجلة دى) طبعاً ده خبر أنا قرأته من سنين ولا أستطيع تأكيده إلا من خلال شواهد علاقتنا بأمريكا

عدى النهار said...

مراكبى

مافيش مقارنة ولاحاجة (راجع ردى على تعليق حلم) مش أكتر من مصادفة كما ذكرت

بالنسبة للخبر.. هو طبعاً مصيبة لكنه مش جديد بالنسبة لى.. قرأت ألعن منه وعن نفس الموضوع

حائر في دنيا الله said...

هذه هي نقطةو بسيطة في الفارق الرهيب بينهم وبيننا
هم يهتمون حتى بالشخير ونحن نهمل أِياء مهمة لنا ولمجتمعنا، لان من يحكمنا موظفين وليسوا محبين لهذا الوطن

مع تحياتي

حراس الحقيقة said...

حلو اختراع القميص ده وفعلا موضوع الاختراعات المتعطله والمشاريع المركونه والطاقات الغير مستغله موضوع صعب جدا
حاجه تحزن ان مصر من اذكى البلاد اللى فى العالم والطفل المصرى من ازكى الاطفال اللى فى العالم وده ثابت علميا الى ان يدخل المدرسه وده برده ثابت علميا حاجه تغيظ اننا نكون نقدر نعمل حاجه فعلا ومحدش بيشتغل ولا حد بيحاول يستغل الفرص المتوفره دى كلها
موضوع جميل الصراحه

loumi said...

العزيز عدى النهار
بما ان المصريين فهلويين
فانا من بكرة حاشترى
علبه كور لكل فرد من افراد الاسره اللى بيشخروا
على فكرة اخر علبه كور كانت ب25 جنيه يا بلاش
و حالزق على ظهرالبيجامات الشريط اللاصق بتاع الكوتشيهات
هو انا لسه حاقعد اخيط جيوب
هههههههههههههههه
-----------------------------------
شويه جد بقا
امال هى الناس بتهج من البلد من شويه
دى سياسه وما علينا الا التنفيذ
واللى مش عاجبه يشرب من البحر
واللى يقدر ينفد بجلده
تحياتى

مجهول said...

هههههههههههههههه
والله ناس بتفكر
طيب ما ممكن يشوفوا حل علمي اكتر من كده
عمليات جراحية مثلا
عموما
المشكلة هناك ان كانت مشكلة هي طغيان السوق في التعامل وهو ما يقتل البحث او التفكير العلمي قليلا

مشكلتنا هنا
ان ولا فيه سوق ولا فيه بحث
احنا هنا سوق او مولد بالمعني المعروف

سعدت بزيارتك واسمحلي بالتجول بين خواطرك لأقرأك قليلا

اه يا دماغى said...

التشخيير

ومنسجلش اختراع ممكن تفيدنا
عشان الرسوم

حاجات غريبة وصعبة فى مجتمعنا

تحياتى

S H A H said...

خبر يغم فعلا, انت لو تعرف عددالمخترعين بقى اللي مدينة الحرفيين من سمكرية و ميكانيكية و ميعرفوش انهم ممكن يسجلوا اختراعهم تعمل ايه

بوست جميل

Rosa said...

بجد حراام بقا بجد
هقول ايه بس لا حول و لا قوة الا بالله
حسبنا الله و نعمى الوكيل
اهو دا حال اخويا , في كلية هندسه
طول عمره ماشاء الله ذكي و عنده افكار جميله و عمليه لمشاكل كتير
من كام يوم بقوله مايلا بقا انت خلاص اتخرجت اخترع حاجه جديده بقا من افكارك الحلوه , قالي اه اخترع عشان يحبطوني في الاخر و كل تعبي يروح بلاش
نقول ايه بس حسبنا الله ونعمى الوكيل عشان تترفض الكميه دي من الاختراعات عشان مسددوش مصاريف اداريه
بجد بقا خلاص هنفجرررررررررررررر
تحياتي

عدى النهار said...

حائر فى دنيا الله

فى تصورى لاتوجد مشكلة مهما كانت صغيرة مقارنة بغيرها لاتستحق الإهتمام بحلها... وطبعاً فى أولويات

بمعنى آخر لن نهتم بحل مشاكلنا الكبيرة إلا إذا كان عندنا وعى بكل مشاكلنا.. الذى يبدو منها تافهاً والمهم منها

====
حراس الحقيقة

تراب كتير غطى كل الصفات الجميلة الواعدة التى ذكرتها عن البلد وأهلها

====
لومى

كلامك صح... للأسف

====
مجهول

هو فعلاً فى أجهزة لكنها غالية ومزعجة فى إستخدامها. والعمليات الجراحية أيضاً موجودة لكنها أيضاً مكلفة وطبعاً الجراحة بصفة عامة لها خطورتها الغير مشجعة لكثير من الناس

أرجو أن تستمتع بتجوالك فى هذه المدونة المتواضعة... شكراً لك

====
آه يادماغى

حياتنا مش صعبة من شوية

====
شاه

الناس دى مُهمَلة رغم اللي الكتير اللي ممكن يقدموه فى مقابل القليل جداً

أقول إيه.. ربنا ييسر لهم من يساعدهم بالمال والتوجيه

====
روزا

زى ماقولتِ... حسبنا الله ونعم الوكيل. لكن أخوكى لازم يطبق اللي يقدر عليه من أفكاره مش ضرورى تكون أفكار كبيرة محتاجة لتعامل مع جهات حكومية أو رأس مال كبير لأن هى دى الحاجات اللي ممكن تكون مصدر إحباط. ربنا يوفقه

Xee said...

هههههههه

اختراع هايل الصراحه
و انا اخالف الجميع الرأي في المقارنه بين تسجيل الاختراعات في مصر و الخارج

لان ببساطه شديده جدا، المحترم صاحب اختراع قميص التشخير بنى اختراعه على اختراع مصري اساسا ، الا و هو التشخير ذات نفسه
:)

و تصبحي على خير يا مصر

Gid-Do - جدو said...

عدى النهار

العبارة فى الدبارة والارش ضاع
الاكس فى التكس والسنجة فى الرنجة

ما تحولش تفهم انا بقول اية لانى انا نفسى مش فاهم انا بقول اية

دة اسلوب التفاهم فى بلدنا الحبيب ناس بتتكلم مش عارفة بتقول اية وناس بتسمع ومش فاهمة بيتقال اية

ولو فرض جدلا ان مكتب براءات الاختراع فى مصر سجل 1542 اختراع وبلاش
مين من الشركات او اصحاب رؤوس الاموال بيروح يتبنى مشروع من دول وينفذة ويطرحة فى السوق ـ انا عمرى ما سمعت عن تنفيذ مشروع مصرى واحد ـ يبقى مصيبتنا من داخلنا برضة رؤوس الاموال فى كندا وامريكا بدور على حاجة تحل مشكلة او تطور شئ موجود مش علشان عيون المخترع ابدا علشان رؤوس الاموال تعمل فلوس اكتر لكن احنا رؤوس اموالنا بتتهرب برة البلد

عدى النهار said...

زياد

أول مرة أعرف إن الشخير إختراع مصرى.. بس كل شىء جايز أصل إحنا أودام أوى. على العموم هم تفوقوا علينا وعندهم 100 مليون مشخراتى :)

=====
جدو

طبعاً متفق معاك
والأمر كله يحكمه توجه النظام وإهتماماته. يعنى مصر زى ما الكل شايف عندها الإمكانيات الفكرية والمادية لكن النظام بيتحرك فى إتجاه معاكس للمصلحة العامة

محمود الدوح said...

يالهوى
يعنى ال3 كور دول ب33دولار
*6
يبقى كام
المصريين عندنا هيجيبوا التى شيرتات فاضية ويملوها كور تنس

اول مرة ادخل مدونتك
وبجد جميلة جدا
تحياتى

عدى النهار said...

محمود

مافيش داعى للخضة دى أسعار بلاد بره
:)

أهلاً بيك وشكراً لك

اسكندراني اوي said...

برضه حيفضلو يخترعو

بس المفروض ياخدو اختراعاتهم ويروحو حته تقدر العقليات النابغه
انما لو فضلو في مصر ...مش حقولك
اسالو احمد زويل وهو يقولكم

عدى النهار said...

إسكندرانى

يمكن يكون كلامك صح لكن الواحد نفسه إن فكر الناس وخيرهم يعود عليهم وعلى بلادهم يعنى الإستنذاف ده يكون له نهاية