Wednesday, June 4, 2008

أم العروسة


فاضية و مشغولة

رغم إن مافيش لا عروسة ولا فرح لكنه أول مَثل مر ببالي بعد متابعة الأحداث الأخيرة وبعض "الكلام" المثار حولها

مش غريبة إننا مش مدركين إن الإعتداء على الغير ومِلكية الغير مرفوض!؟

مش غريبة إننا مش مدركين إن الإعتداء على مكان عبادة مرفوض!؟

مش غريبة إننا مش مدركين إن البلد سايبة ومافيهاش قانون!؟

مش غريبة إننا مش مدركين إن الأمن مالوش شغلة غير حماية النظام!؟


مش غريبة إننا مش مدركين إن فى ناس عايزة تشعل حريقة فى البلد!؟

مش غريبة إننا مش مدركين إن العصبية والغِل مش بيحِّلوا مشكلة!؟

مش غريبة إننا مش مدركين إن فى صادق وفى كاذب!؟

مش غريبة إننا مش مدركين إن كلنا فى الهم سوا وآخرتها مالناش غير بعضنا!؟

مش غريبة إننا مش مدركين من العدو ومين الصديق!؟

مش غريبة إننا مش مدركين إن "بعض الكلام نور وبعضه قبور" على رأي بنت القمر!؟

مش غريبة ومش غريبة ومش غريبة......!؟

مش غريبة إننا مش مدركين إن مش فاضل لنا غير تَكّة وينفرط عقدنا!؟

13 comments:

صباح الخير يا مصر said...

تقاطعات
***********
المشكله ان العقد لما ينفرط ماحدش ممكن يتصور السيناريو القادم هايبقى اد ايه سئ....ربنا يستر
ولك الله يامصر
تحياتى

Bella said...

مش عارفة اقول لك ايه صراحة
حاسة اني مكتئبة جدا
واللى مضايقني اكتر ان فيه ناس مش مدركة كل اللى انت بتقوله ده وشايفين مافيش مشكلة اصلا

يعني زي مافيه ناس الهم واكلها وشايفة اننا على الحافة وفاضل لنا شعرة او نسمة هوا بسيطة ترمينا في جب سحيق من فوق جبل عالي

فيه ناس عايشة حياتها عادي جدا ولا حاسة باي خطر

ربنا يستر

... said...

لا والله لسه فيه أمل
يمكن احنا بس مش شايفينه
عبده باشا كتب في الموضوع الأخير دة
والقهوة العالية
حملة مصارحة ومصالحة بتقول ان فيه شباب كتير فاهمين ومش في القطيع
مش عارفة أقول اية ولصالح مين التقطيع دة

.:.-=- ELGaZaLy-=-.:. said...

مش غريبة إننا مش مدركين إن العصبية والغِل مش بيحِّلوا مشكلة!؟

مش غريبة إننا مش مدركين إن فى صادق وفى كاذب!؟

مش غريبة إننا مش مدركين إن كلنا فى الهم سوا وآخرتها مالناش غير بعضنا!؟

مش غريبة إننا مش مدركين من العدو ومين الصديق
----------------------------
الغريبة اننا قابيلن دة وجداا...بجد بس صدقنى الامل قريب اوى بكرة جايب معاه ضئ قريب اوى ..

عدى النهار said...

صباح الخير يا مصر
لاقدّر الله لو حصل حيبقى سىء جداً ولنا فى ما حدث فى دِول أخرى عبرة

Bella
المشكلة فى طريقة تناول بعض اللي شايفين إن فى مشكلة لهذه المشكلة. وهم دول اللي البوست يعنيهم

بثينة
فى أمل.. وإنشاء الله الحال يتعدل. زى ماقلت لبيلا اللي دفعني للكتابة دى هو طريقة تناول البعض للموضوع. الكتابات والتعليقات والتعقيبات بقدر ما فيها من كلام مُحترم إلا إن الأمر لم يخلو من لغة فيها كل ما أشرت إليه فى البوست

الغزالي
قبول بس مش من نوع القبول اللي بيعني الرضا.. تقدر تقول ساكتين عليه من باب الإعتياد على السكوت
إنشاء الله بكرة يكون أفضل

قوس قزح said...

تفتكر فعلا هم مش فارق معهم ؟ ولا عارفين و ساكتين و مستنين ؟

كلام بيلا صح فى ناس كتير اوى - و من المطحونين - بحس ان مش فارق معهم غير لقمة العيش و بس
و ناس تانية اللى فارق معها ان يبقى صوتهم عالى و يلفتوا النظر

قليل اوى اللى بحس انه بجد عايز يبنى و عايز يغير من الحال .. و يمكن من المدونات اللى بلاقى ده واضح اوى فيها .. عصفور الجنة .. رحايا العمر ..عدى النهار

يارب الامل يكون قريب و يقدر جيلنا يعيشه




على فكرة لما تقبل التاج لازم مش تحتفظ به كتير .. اتصرف بقى :)

بنت القمر said...

غريبه
فعلا غريبه ها اشد لينك
انا حرة
:))

عدى النهار said...

قوس قزح
المطحونين البسطاء دول هم اللي ممكن تكون فارقة معاهم وجداً كمان لأن هم أول من سينكوى بنار اللي حاصل. هم بس طاقتهم رايحة فى الجرى وراء لقمة العيش

التاج بأه حاشوف له حل قريباً
:)

بنت القمر
براحتك طبعاً
:)

بنت القمر said...

عاوزة اعرف ازاي الخط بولد في التعليقات؟؟
ممكن
وش محرج

loumi said...

بيقولوا العند يولِّد الكفر

والإنتظار يولِّد الإصفرار
بمعنى السقم والعله

المشكله إن دايما بيتعاملوا مع المشكله بشكل سطحى وليس جذري
وبالتالي تهدأ المشكله لفتره ولكن يبقا النار تحت الرماد وما أن تهب ريح بسيطه حتى تعود النار للإشتعال وبقوة أكبر

لا أحد يريد تحمل مسؤولية فتح أي ملف ومناقشته بصراحه ووضوح والتوصل فيه لحل جذري
مع إن المواجهه هي أسلم وأقصر حل ولتكن النتيجه ما تكون ولكن يغلق الملف ويفتح آخر وهكذا

الحكايه محتاجه ناس قلبها على البلد
وهم كُثُر ولكن أصواتهم غير مسموعه
ونتمنى أن يُسمع صوتهم قبل فوات الأوان

تحياتي لك

عدى النهار said...

بنت القمر
وليه الحرج!! أنا أرسلت لك الطريقة فى الميل لأنها ماتنفعش تتكتب هنا. البلوج بيحاول يشغلها ومش بيعرض العلامات
tags
جربي ولو فى مشكلة قولي

لومي
المشكلة بتزيد كمان لما بعض رجال الدين يتصرفوا بأسلوب يخلو من أى حكمة ويزيد الطين بلّة مش عارف عمداً والا إيه بالظبط

وميض ابتسامة said...

يا صديقى

أعترف ان الكلام مؤثر ويوجع القلب
لكن أوعى تفتكر ان مفيش حل .. بالعكس ده انت لازم يكون عندك يقين ان النهار لازم يطلع بعد الليل
هى الحياه كدة يوم لك ويوم عليك ولازم فى يوم كلنا ح نقف ونتأمل أخطاءنا بس ان شاء الله مش بعد فوات الاوان وطالما لسة فى ناس بتحب بلدها يبقى تأكد ان مصر بخير .. والسلام

عدى النهار said...

وميض إبتسامة

متفق معاك إن فى حل وإنشاء الله يحصل قبل فوات الأوان. الخوف من إن الأمور فى تصاعد غريب وللآن مافيش خطوات فى طريق الحل

ربنا يفرجها من عنده