Thursday, November 15, 2007

هلوسة من مستقبل بعيد


ياترى العجز الحالى عن وقف السرقات والتهليب الحاصل يعنى أن ما تم نهبه أصبح حق أصيل للناهب وأبناءه وأحفاده وأحفاد أحفاده ....؟ وهل يصح المطالبة بالحقوق المنهوبة وإستردادها ولو بعد عشرات السنين؟ وكيف يتم ذلك بصورة عادلة؟ يعنى مثلاً قطعة أرض ملك للدولة تم بيعها بالتحايل بأقل من 1/100 من ثمنها وأقام عليها المشترى مشروع ما.. لو فرضنا أن ظروف الحكم تغيرت بعد عشرات السنين وأصبح للقانون معنى وسطوة ، هل يحق للدولة إسترداد حقها ، والذى هو حقى وحقك ، فى قطعة الأرض تلك؟ مع العلم أنه فى الغالب لن يكون أحد ممن عاصروا الحادثة حين وقوعها على قيد الحياة

الهلوسة اللي تحت دى نتيجة عجز أمام وضع قائم مع عدم التسليم به

يحكى أنه فى قديم العصر والزمان كان يحكم مصر رجل إسمه مان كل همه رد الحقوق للسكان اللي هم أحفاد سكان عاشوا فى عصور كلها هوان أرضهم وثروة بلدهم إتباعت فيها لكل من هب ودب من كل مكان

قام مان وبص فى أرشيف قديم على جَمعه قام مجموعة واعية من السكان القدام وتوارثته الأجيال

بص فى الأرشيف وقال فلوس فلان وفلان وفلان أساسها الرشاوى اللي خدها أجدادهم لبيع أراضى وشركات ومصانع وبنوك كانت فى يوم ملك للشعب الغلبان. ده واضح هنا وهنا وهناك كمان ، وعليه قررنا تأميم اللي جه من اللي كان والحالة دى التأميم فيها حلال

بص تانى وشاف كمان العز فيه أحفاد فلان اللي إسمه على ورقة كان يعمل من المقاريض أفيال وقطط ثمان.. قال دول كمان مالهومش حق فى اللي كان

وفصفحة تانية شاف قرار بيسهل إحتكار الحبايب والقاريب والصحاب لكل مصدر خير ووقف حال العباد لصالح عصابة من الحيتان.. قال لا عاش ولا كان اللي يسكت على ظلم كان ولو زمان

جه البنك اللي دولى كان وقال مش ممكن كده! فيه قانون وبلدك وافقت على كلام يلزمها بحاجات يا مان.. قاللهم مين اللي قال!؟ حكومات بلادكم قالت إننا كنا بعيد عن مقاييس الأمان فى إنتخاب كل حكامنا الهمام.. عشان كده كل الكلام اللي وافق عليه اللي كان مايلزمناش بشىء لأنه بإعترافكم خان السكان

فكرة البنك اللي دولى كان عجبت مان وقال نبص فى الأرشيف كمان. شاف قروض كتير وراها قصص وحاجات جنان قال.. برضه ده كلام! حكام مش تمام بإعتراف الداين قبل المدان.. يروحوا يستردوا دينهم من رجالتهم بتوع زمان

هلوسة لو تصبح حقيقة بوعى مش تلطيش عيال..... ماكنش حد غِلب


19 comments:

Amr Ibrahim said...

البوست جميل أوي يا مدحت

الفكرة علي فكرة واتتني و الناس كلها تتحدث عن بيع البلاد , مش دي المسكلة لأن فعلا يمكن إن شاء الله استرجاع كل شيء

أحييك علي الفكرة و البوست الجميل و هرب فلوسك بره قبل ما تحصل حاجه من دي

:D

عدى النهار said...

هم أنصح منى ومنك يا عمرو وعارفين إنهم حرامية علشان كده فلوسهم مش فى البلد وإلا كان الوضع بقى مختلف. وبعدين دى ناس أغلبهم بتشتغل أو بتلعب بقروض من البنوك يعنى مش فلوسهم

أما عن فلوسى فهى فى البلد وممكن جداً يكون بيلعب بيها واحد من إياهم.. ربنا يستر

allfollowsome said...

ههههههههههههههه

جامدة جدا

مش ناصرى برضه يا مان

عصفور المدينة said...

أخي وحبيبي الرائع أستاذ مدحت

فعلا حصل الكلام ده قبل كده بص تحول إلى صالح مان وعصابته

وتصدق إنك أثرت موضوع محتاج اجتهاد فقهي
:)

... said...

حدوتة مستقبلية متفائلة جدا.. ان هييجي مان ابن مان في البلد دي ويرجع حق لصاحبه.. وارد انك تحلم بوجود هذا المان يا مان.. بس انه يتحقق..لازم نقول للزمان ارجع يا زمان..حق الحلم مشروع

Tamer Nabil Moussa said...

السلام عليكم

الفساد موجود وعايز جهد وناس عندها ضمير عشان تقضى علية

وعلى ما تظهر

ربنا يرحمنا ويصبرنا

تحياتى

اسامة يس said...

اشاركك الهدف من الهلوسة والنتيجة ولا اشاركك الراي في العلاج الهلوسي .. فقد جاء به ناصر من قبل فكان وبالاً وكان ما كان....

اذا كان لابد فلنقيم مشاريع ومؤسسات ويكون هناك دور حقيقي للشعب للبشر للناس .. دور في المشاريع دور في النشاطات الاهلية .. دور حقيقي للمجتمع المدني .... اما التأميم واعادة الحقوق من الاحفاد الذين ورثوا ... فستتكرر كارثة الماضي القريب... ويعتلي السلطة عكسر ولا طائل من ورائهم الا تعذيب البشر والحقد...

دمتم بكل ود...
خالص تحياتي

عدى النهار said...

طاهر
أبداً مش ناصرى ولا حاجة. محاولة رد الحقوق مش حكر على ناصر

عصفور المدينة
الله يبارك فيك يا أخى ويديم المحبة المتبادلة بينا. الموضوع فعلاً محتاج إجتهاد فقهى لو كان الهدف تحقيق العدل

حلم
مين متفائلة دى :) رغم إنها هلوسة لكنى على يقين من تحققها وإن كان فى غير زماننا.. الزمن دوّار كما يقال

تامر
وعليكم السلام ورحمة الله وبركاته
ربنا يرحمنا ويصبرنا فعلاً ويخرجنا منها على خير لأن ما هو حاصل زاد عن طاقة البشر

أسامة
هو أنا مع عدم إثارة أحقاد وخلق مظالم أخرى لكن ذلك لا ينفى ضرورة رد الحقوق بدون نعرات غل وإنتقام

بنت القمر said...

شفت فيلم وثائقي مره بيصف فيه شخص هارب من وظيفه في البنك الدولي كيف ان الحكومه الامريكيه والبنك الدولي تسارع الي تقديم القروض الي دول العالم التالت حتي يسهل عليها ان تكبل الحومات وبالذات دول امريكا اللاتينيه تحديدا في ديون لا يستطيعوا الوفاء بها اما اسلحه بلا قيمه اومشروعات وهميه او حمايه للحكومات العميله وحين ياتي ميعاد السداد ولا تستطيع تقدم لها ديون جديده لسد الدين القديم بالاضافه الي الفايد ه المركبه من الدين الجديد والقديم معا وفي النهايه يصبح كل شئ مرهون وتصبح الحكومه نفسها مرهونه بمقدرات الشعب عشرات السنوات مقدما
ربنا يرحمنا ويخرجنا منها علي خير

عدى النهار said...

بنت القمر

فاكر مقال قديم كتبه أحمد بهاء الدين قال فيه إن - وقتها - كان فى تكدس للأموال فى البنوك الأجنبية وكان إستثمارها الأمثل هو إقراضها للدول اللي زينا لدرجة إن فى عملاء لهذه البنوك عملوا ثروات من وراء ذلك. والمقترض هنا عبيط أو حرامى

Bella said...

حلم جميل

هو المشكلة لو المان المان ده جه ينفذ وجاب مانز غيره هههههههه
وطلعوا العن من الحرامية اللي مفروض يحاسبهم

وبعد مايتم المراد من رب العباد وترجع الحقوق لاصحابها الافتراضيين يعني

قوم ايه تروح الحاشية اللى حوالين المان الطيب ده حاطة ايدها على كل شيئ وهات ياتفريق وعبي وشيل واحمدك يارب

والمان ياولداه مايعرفش
او عارف ومطنش


اما بخصوص تهريب الفلوس للخارج فهذا امر لايفعله لصوص البلد المحليين فقط ولكن حتى اللصوص الاجانب ممن اشتروا يفعلون نفس الشيئ
فأخي يعمل في شركة قطاع خاص ممن قامت الحكومة بإبار اصحابها على بيعها لمستثمرين اجانب يرسلون نقودهم كل يوم خارج مصر

يعني ممكن في اي لحظة تحسبا لاي حركة تأميم او ماشابه يركبوا اول طيارة ومش بعيد يكونوا بايعين المباني من فترة ومهربين فلوسها

وتبقى البلد خاوية على عروشها ويبتدي الناس ياكلوا بعض من الجوع

ده لو لقيوا بعض ياكلوه اصلا

loumi said...

العزيز مدحت

جميله الهلوسه

وأنا كمان عندي أمل

بس التغيير مش على زماننا يمكن اولادنا

يمكن أحفادنا

الزمن دوار

والتاريخ يعيد نفسه

عارف انا قطعت الكلام
بشكل شعري طلع شكله حلو

تعيش وتهلوس

MKSARAT - SAYED SAAD said...

هلوسة من وجهة نظر البعض الذين من قاموا بنهبنا الابشع ان احسادنا ايضا تنهب
وضعت يدك يا عزيز على جرح اخر من جروج جيلنا
فيا تري سيأتى يوم تلتأم هذة الجروح كل المعطيات الان تأك مليون لا
تحياتي لمدونتك الجميل
دمت بكل ود

عدى النهار said...

بيلا
تفتكرى لو حد عدل بحق جه ممكن يحيط نفسه بناس فاسدين!؟

لومي
تعيشي وتشعرمى :) هو صعب تخيل حدوث شىء له معنى فى زماننا لكن ربنا يخيب ظننا.. آمين

مكسرات
هو أنا ماعندى شك إن هاييجى يوم والأحوال تنعدل

يا مراكبي said...

آخر كلمة في البوست كنت هأقولها فعلا بس لقيتك كاتبها

ياللا نكررها تاني: ما كانش حد غلب .. يامان

عدى النهار said...

يامراكبى

ونكررها تالت.. ماكنش حد غلب

loumi said...

حلوة أشعرم دى
:):):)

دى مشتقه من شعر مان؟
:)
تحياتي

lastknight said...

ليس حلما يا عزيزى ولا هو هلوسه .. لكنه ببساطه هدف .. فعلا هدف مشروع و نبيل .. نسأل الله أن يحققه بعد أن نؤدى نحن ماعلينا من واجبات لمواجهة الظلم و الظالمين

عدى النهار said...

lastknight

رغم العنوان إلا إني مقتنع تماماً بإمكانية إصلاح الحال