عربية كارو

سقطت الياء عمداً من كايرو

عربية كارو كلها خشب.. حتى عجلها خشب.. تم تقطيعه ببلطة وتجميعه ليكوّن فى النهاية كارو. ضربة البلطة سايبة علامة فى كل مكان لمسته ولون الكارو لون الخشب بعد فعل الزمن

كانت فى ميدان رمسيس.. مُحمّلة بكل شىء وبيجرها حمار
حمولتها كانت كبيرة على الحمار وماكانش قادر يقوم بيها تانى بعد ما وقفت فى إشارة مرور

العربجى كان زى الثور الهائج مش عارف يعمل إيه
الكل وراه متعطل والحمار مش قادر يجر الكارو.. ورطة
إبتدى يرمى الحمولة حتة حتة لعل وعسى
لكن مافيش فايدة.. الكارو كانت تقيلة كبيرة خشبها ضخم وحمولتها كبيرة

راجل مُسن واقف جنبى قال.. الحمار تعبان محتاج يرتاح
قال إنه عنده محل فى المنطقة وشاف الكارو دى معدية من كام سنة

سألته ليه الحمار المرة دى مزرجن؟
قال إن الحمار ده مختلف عن اللي شافه قبل كده بيجرها
ده بيجر على سطر ويسيب عشرة والحمولة بتقع بسببه على الأرض

قلت يعنى مش المفروض كارو كبيرة كده يجرها حمار
قال صح.. المفروض فرس يجرها
قلت بغل أحسن.. إلى أن يتم العثور على الياء التى سقطت
إستغرب.. لكن لما عرف ميزة البغل على الحمار والفرس رحّب
البغل أصله نتاج تزاوج فرس وحمار وبيجمع من الإثنين كل ميزة.. وزيادة
وإيه هى الزيادة!؟

البغل عقيم مابيخَلفش

إيضاح: المقصود بسقوط الياء عمداً هو فقدان الهوية والذى أدى إلى تغيٌر الملامح تماماً فأصبحت كايرو (مجازاً و المراد الكل) عربية كارو لا يصلح معها غير الجر. والرجل المسن أوضح أن حمير كثيرة توارثت جرها.. فالياء سقطت من زمن بعيد. أما البغل فهو حل مؤقت لقضية التوارث البيوليجى لجر الكارو لحين إسترداد الهوية

الوصول

الوصول المعني هنا لا علاقة له بوصول الدراويش وما يشمله من شقلباظات فى الهواء وخطوات على الماء

زى إنهاردة من 11 سنة وصلت لتورونتو بعد رحلة طويلة من القاهرة لأثينا لمنتريال لتورونتو

كانت أطول فترة قضيتها جالساً ولاتتخيل ما يعنيه ذلك إلا بعد أن تجربه شخصياً ، الخبرة لها ثمن برضه
وصلت تورونتو بدون أى ترتيب.. مافيش حد أعرفه ومافيش حجز فى فندق ، كنت متصور إنى هالاقى غرفة فى فندق بسهولة لكن إتضح أن ذلك كان خطأ كبير. ذهبت لمكتب المعلومات فى المطار ورغم إن الموظف هناك حاول يساعدنى فى الوصول لغرفة فاضية لكن لأنه كان يوم السبت عطلة نهاية الأسبوع وصيف ماكانش فى أمل فى الحصول على شىء. قلت ندور على المساجد هنا نشوف أحوالها إيه. الراجل ماعرفش يساعد وأنا ماعرفتش أوصل لشىء ، لغاية ما شافتنى السيدة اليونانية الأصل التى كانت جالسة بجوارى فى الطائرة

كانت ست أروبة.. راحت عدل على الجزء الخاص بالكنائس وأماكن العبادة فى دليل التليفونات ، وفعلاً وجدت رقم تليفون أحد المساجد هناك. إتصلت بهم وكان حظى كويس لأنه كان وقت صلاة العشاء وبالتالى كان هناك من يرد على التليفون. كتبت العنوان وشكرت السيدة على مساعدتها وأخذت تاكسى للمسجد

الجو كان جميل ساعتها كان فى مطر خفيف مجرد رزاز والتاكسى ماشى فى الطريق بسلاسة غير معتادة لواحد قادم من القاهرة

المهم.. وأنا قاعد فى التاكسى وعمَّال أمنّى نفسى بقرب الوصول للمسجد مش لأى سبب غير تكة العداد السريعة
لاحظت إن التاكسى ماشى فى إتجاه عمود طويل فى آخره أنوار.. هو الحق كان طويل شويتين تلاتة
سألت السائق هو إحنا لسه بعيد قال لأ قربنا
شوية ولسه ماشى فى إتجاه العمود إياه.. قلت مابدهاش وسألت السائق
هو ده المسجد.. الذبون إفتكر إن العمود يبقى المأذنة!!! ؟
هو مين؟
العمود المنوّر ده؟
ده يبقى الـ
CN tower
آ آ آ ه

وصلت المسجد وإتعرفّت على بعض الناس هناك وإبتدى مشوار 11 سنة

عرفت بعد كده إنى سألت السائق عن أحد أطول مبانى العالم بإرتفاع 553.33 متر
قلت فى بالى الحمد لله إن الراجل جاوب بإستغراب فقط

.

.

مرّ حوالى 3 سنوات على عملى بالشركة وفى يوم دُعيت من الشركة مع 4 آخرين على العشاء فى المطعم الخاص بهذا البرج.. كانت أيام عز فى الشركة قبل سنة 2000. كنت ناوى أعتذر لكن غيرت رأي لمّا عرفت مكان العشاء

ذهبت للمكان مع مديرى بعد إنتهاء العمل. المطعم كان فوق فى العلالى خالص والأسانسير الزجاجى كان ماشى كويس لفترة قصيرة وبعد كده إبتدى يلب بمعنى الكلمة وكل ما يعلى أكتر يلب أكتر وطبعاً كل اللي فى الأسانسير قلوبهم تلب معاه بس كله كان عامل جدع. كنت باخطف نظرة سريعة لأسفل من لحظة لأخرى ، الحق المنظر كان جميل. إكتشفت إن الحل الوحيد للمواقف المرعبة دى إن الواحد مايفكرش فيها .. طبعاً لو يقدر
وصلنا المطعم الدائرى اللي بيلف.. المكان فعلاً عالى جداً جداً وكاشف كل المدينة
مساحة شاسعة مغطاة بالأضواء

برغم جمال منظر المدينة من هذا الإرتفاع إلا إنه كان جمال مُهندّس بشكل يزهد النفس فيه بعد دقائق
كل المدينة عبارة عن خطوط متعامدة من الأضواء اللي هى بتمثل طُرق ومبانى وكبارى
فارق كبير جداً بينها وبين جمال أضواء القاهرة عند مشاهدتها من مكان مرتفع أو طائرة مثلاً أثناء هبوطها

بالنسبة لي عشوائية أضواء القاهرة ، برغم مشاكل المدينة ، بتعطيها جمال طبيعى مُبهر

تذكرت تلك الأيام بعد مشاهدة برنامج تلفزيونى ناقش بعض الإحصائيات عن المهاجرين لكندا وقوانين الهجرة. من الأشياء الغريبة التى ذُكرت فى هذا البرنامج أنه تقريباً 43% من الجيل الثانى للمهاجرين (مولود بكندا لأسرة مهاجرة) لايشعرون بأنهم كنديين. أعتقد أن مشكلة ذلك الجيل أكبر لأنهم لايشعرون أيضاً بإنتمائهم للبلاد التى جاء منها والديهم

تحديث: الفقرة الأخيرة من البوست كانت إعتراضية لذلك جاءت مُختصرة ، لينك البرنامج والذى كان عن المهاجرين لكندا من مختلف البلاد ولم يكن عن العرب والمسلمين. كلمة قصيرة جاءت فى بداية البرنامج نقلاً عن طارق رمضان من محاضرة له عن تكامل المهاجرين المسلمين فى المجتمعات الغربية التى هاجروا إليها.. هذه الجملة أعجبتنى من ضمن ما قال

you can remain who you are, but you can't neglect where you are

تاج

وصلني هذا التاج من بيلا والحق ماعرفتش أو بمعنى أدق إتكسفت أتجاهل طلبها مع إن كل الأسئلة مُركبة وشكلها كده من تأليف جهة سيادية من إياهم

إسم مدونتك؟
ماله؟

لماذا اخترته ..وماهي نيتك من وراء اختياره؟
فى رأي إن كل نقطة تقاطع فى حياتنا مع حدث ما أو موقف أو شخص أو فكرة... بتأثر بشكل ما فى تحديد خطواتنا التالية

هل فكرت في إغلاق مدونتك؟ والسبب؟
المدونة شغالة 7 أيام/24 ساعة. لو قررنا إغلاقها سيتم إعلام سيادتكم بالسبب

صورتك في المدونة ورمزيتها ؟؟
هاروح أجيب صورة وآجى أجاوب

لماذا دخلت عالم التدوين من الاساس؟
كنت ماشى ولاقيت باب مفتوح دخلت.. لاقيت الجو كويس أخدت ركن وقعدت

التعليقات بالنسبه لك ,اهميتها؟
تواصل مطلوب بيعطى روح للمدونات

احلى بوست كتبته ...ضع اللينك , ثم اذكر لماذا؟
أول ماسمع كلمة أحلى بافتكر كلمات جاهين اللي غنتها ماجدة الرومى "أحلى مافى الحلق طعم المُر مالذكرى شوفوا المرار لمّا يبقى حلو ياجدعان" نرجع لموضوعنا.. أحلى بوست كتبته؟ مش عارف.. مافكرتش فى الأمر من الزاوية دى خالص

أفضل بوست قرأته؟ وضع لينكه؟
مافيش بوست واحد أقدر أقول إنه الأفضل لكن بوست لو ندرك الحقيقة حسيت إنه وليد لحظته جداً وفيه معنى حقيقى واضح لكن يمكن كتير منا بيغفل عنه. و فى بوست آخر قديم شوية من مدونة مهمة زيارتى لها متكررة من وقت لآخر قرأته من يومين و شايف إنه بيقدم صورة ياريت الناس تستوعبها كلنا ليلى ..آه يا ليلى كفاية كده على السؤال ده لأن القائمة طويلة جداً

أفضل مدونة قرأتها؟
هى مدونات وليس مدونة واحدة. لكن عامة كلما قل التكلف فى إختيار المواضيع وطريقة صياغتها كانت المدونة هى الأفضل عندى. وطبعاً التعليقات والتعقيبات عليها بيضيفوا قيمة كبيرة للمدونة

حد قل أدبه فى التعليق إيه رد فعلك؟
ماحصلش الحمد لله وماحبش أفترض حدوثه

أسوأ مدونة؟
هو التطرف فى عرض أى موضوع بيفقد المدونة قيمتها

أسوأ بوست أسوأ مدون...............؟
صاحب المدونة السابقة

هيحصل ايه لإيميلك لما تموت ؟؟
يمكن يروح لمقبرة الإنترنت

اديت الباسوورد لحد قبل كده؟
لأ

كانت إيه طبيعة علاقتك بيه؟
ليه الإفتراض إنه حصل وإديت الباسوورد لحد؟

اسمك؟
مدحت

المشهور بيه وسط اصحابك؟
مدحت

شخصيتك نوعها إيه؟
نوعها إيه إزاى يعنى؟ يمكن أكون نيمكى شوية أحياناً

السفر بالنسبة لك؟
سين فاء راء

وقت فراغك بتعمل فيه إيه؟
باعمل فيه حاجات فارغة

المود بتاعك؟
دلوقتى؟ مندهش من الأسئلة بصراحة وقربت أطق :)1

الاكلة المفضلة؟
الأكل الخفيف عامة

الصفات اللي أخدتها من بابا؟
قليلة جداً.. هو الوالد الله يرحمه توفى وأنا فى إعدادى وكان مريض قبل ذلك لفترة و بالتالى ماكانش في فرصة كافية للتفاعل

الصفات التي أخدتها من ماما ؟
الوالدة الله يرحمها توفت وأنا فى الجامعة فالحمد لله أخذت منها كتير. هو فى الآخر الصفات المكتسبة من الأب والأم على أهميتها الشديدة بتفضل مكون مهم جداً فى الشخصية لكن الإنسان أمامه سنين قصرت أو طالت وظروف وتغيرات بتكسبه ، قصراً أو إختياراً ، صفات أكثر ويمكن تختلف كتير عما إكتسبه من الوالدين

اكتر ست حاجات بكرهها؟ أنا هافترض إن المقصود هنا صفات
هو أنا أكره جداً التجبٌر على الخلق واللوع والجليطة وتمركُز التفكير حول النفس والجرأة اللي فى غير محلها

اكتر ست حاجات بحبها؟
البساطة والإحساس بالنعمة والشكر عليها والإحساس بالغير والإحساس بالمسؤلية والإعتدال فى كل شىء

الشغل بالنسبة لك؟
نعمة كبيرة ربنا يديمها علينا

الانترنت بالنسبه لك؟
عرض مستمر

امرره لمين ؟ وحان وقت التدبيس
أنا مش غاوى تدبيس حد وبالتالى التاج ده هايفضل هنا واللي عايزه يتفضل مشكوراً يشيل من غير إستإذان