Thursday, April 24, 2008

بلال ونظيف


نظيف عليه دين كبير للطالب بلال

اللي حصل إن نظيف كان حايغرق أثناء إستغراقه ، كما جاء بالخبر ، فى الحديث عن ذكرياته أثناء فترة الدراسة بجامعة القاهرة. بلال طالب بأداب القاهرة فمن باب الأدب مد طوق نجاة لنظيف وأنقذه من ذلك الإستغراق وقال له "الجامعة زي الفل والعملية التعليمية زي الفل ورغيف العيش والديمقراطية موجودة والحديد موجود، طيب مصر حزينة ليه يا ريس؟ والشباب معتقلين ليه من يوم 6 أبريل؟ وبكل بجاحة أضاف افرج عن مصر يا ريس.. افرج عن مصر يا ريس" طبعاً الطلبة اللي حضروا اللقاء صفقوا بحدّة

حديث الذكريات الجميلة دائماً جميل لكن عندما تعقد جامعة القاهرة لقاء بمناسبة مئويتها ويحضره رئيس الوزراء بصفة منصبه وكونه درس ودرّس بها يكون المُتوقع منه أن يتحدث ، إلى جانب ذكرياته بها ، عن وضع الجامعة وكيفية تحسينه ده على الأقل يعنى ولو من باب السياسة. لكن مين!! الراجل فى وادى والناس فى أودية أخرى

التفاؤل جميل والمثل الشائع عن المتشائمين الذين لايرون غير النصف الفارغ من كوب الماء مثل سليم لكن نظيف فى تعقيبه على كلام بلال بيطالب الناس بالإكتفاء بنقطة الماء التى يراها هو فى الكوب. فهو "أكد" أن مصر بها حرية وستظل بها حرية.. وأن رغيف العيش الذي لا يعجب الناس ويقفون من أجله في الطابور ليحصلوا عليه في النهاية، هناك من لا يجده أصلاً.. وأن الحديث عن عدم شعور المواطن بالإصلاح الاقتصادي شيء غير صحيح، مشيراً إلي أن هناك بعض الناس تشعر بهذا التحول الاقتصادي.. دى كانت كلماته

مش كان أحس يا بلال تسيبه فى إستغراقه! نتيف مش فاضى ليك ولأمثالك وتقريباً كده الكلام مش راح يخليه يشوف الكوب الفارغ اللي قرّب ينشف.. بس برضه برافو عليك

21 comments:

كلبوزة لكن سمباتيك said...

ايوة على رايك كان احسن يسيبه
ينضف الباقي اللي في الكباية علشان لما نشوفها فاضية منلاقيش حاجة نحزن عليها و نتلهي و نسكت


تحياتي

... said...

وهو دة كان وقته
لكل مقام مقال
ودة كان مقام نهاوند
عايز هتيفة
مش ناس سوداوية انبعاجية شكاءة بكاءة

سمعت عن مية البطيخ

عصفور المدينة said...

هو ليه اعتبر إن الولد بيتهكم عليه مع إن كل حاجة تمام ومافيش مشاكل زي ما الولد بيقول

Amr Ibrahim said...

http://videohat.masrawy.com/view_video.php?viewkey=489689521

ده الفيديو للموقف
الولد شجاع جدا جدا ما شاء الله عليه

بنت القمر said...

عدي النهار
*********

د نظيف قائلاً: أنا مثل كل الشباب الذين صفقوا لك، ولكن أشعر بنبرة السخرية في كلامك، ولو لم تكن في مصر ديمقراطية لما استطعت أن تعبر عن رأيك اليوم.

***********************
هو كويس فعلا ان الولد عبر عن رأيه
وهذه هي الديموقراطيه علي الطريقه المصريه
من حقك ان تتحدث ومن حقي ان لا انصت لك
:))

تحياتي

عدى النهار said...

سمباتيك
مش عارف حقيقى فى إيه تانى ممكن يقضوا عليه بعد ماوصلوا بالناس إنها تقتل بعضعها فى طوابير على العيش

بثينة
تفتكرى نظيف إتعكنن من الكلمتين اللي بلال قالهم؟ ماعتقدش أبداً.. دول أصلهم جبلّة
مية البطيخ؟

محمد
هو كل مشكلته إن بلال أذاع السر اللي نظيف لوحده يعرفه وهو إن كل حاجة تمام ومافيش مشاكل

عمرو
لعلك بخير إنشاء الله. شكراً على اللينك

بنت القمر
كويس إنه لسّه "بيشعر" كنت فاكر إن الناس دى إحساسها مات تماماً

loumi said...

العزيز مدحت

فكرتني بمقطع من مدرسة المشاغبين

لما جيه على لسان أحد أبطالها

عبر الهاتف أظنه كان عادل إمام

لما قال انا رابسو الوزير الجديد

إللي جاي أنظف الوزاره

صباح الخير يا مصر said...
This comment has been removed by the author.
صباح الخير يا مصر said...

عدي النهار العزيز
********
اول مرة اتشرف بالتعليق عندك واحب اقول
حقيقى برافو لبلال لانه اصاغ مايريد
قوله بطريقه مهذبه لا تأخذ عليه وفى الوقت المناسب
أما عن موضوع الكوب النصف مملوء ده فكرنى بأغنيه شعبيه بتقول كوز المحبه أتخرم و عايزله بونطة لحام!!!!!ا
تحياتي

زمان الوصل said...

اقتباسا من كلام "بنت القمر"


ولو لم تكن في مصر ديمقراطية لما استطعت أن تعبر عن رأيك اليوم.


أصلا لو فى "مصر" ديمقراطيه لم نكن لنسمع هذه الجمله !! أى بلد ديمقراطيه حقّا يمنّ فيها رئيس الوزراء على المواطنين بالديمقراطيه !! عمر حد سمع إن "بوش" رد على أحد منتقديه بجمله لها هذا المعنى !! وبعدين "بلال" لم ينجح فى الوصول الى "نظيف" و توجيه الحديث له الا من خلال التسلل و المراوغه و حسب كلامه لم يكن مسموحا لاحد بتوجيه الاسئله لرئيس الوزراء سوى لاعضاء اتحاد الطلبه و من قائمة اسئله معدّه سلفا ثم يكون لدى رئيس الوزاره الجرأه -كنت عاوزه استخدم تعبير آخر- للحديث عن الديمقراطيه فى بلدنا العزيز !! هأأأأأو

قوس قزح said...

السؤال المهم
يا ترى بلال فين دلوقتى ؟

عدى النهار said...

لومي
هى فعلاً محتاجة تنضيف بس متهيألي رابسو مش كفاية دى بقت محتاجة ماية نار

أحمد عزيز
أهلاً بك. الفكرة إن نص الكوباية مش مليان ولاحاجة. هما كل الحكاية نقطتين ومش عايزين يسيبوهم حتى

زمان الوصل
الغريبة إن نظيف وأمثاله مقتنعين بالأونطة اللي بيقولوها رغم كل اللي يعرفوه عن معنى الديمقراطية. مصيبة إن واحد زى ده كان بيدرّس فى الجامعة

رينبو
بلال حى يرزق مافيش حاجة حصلت له غير إن أمن الجامعة تحقق من أوراقه الشخصية وده تصرف منطقى. ماعتقدش إن حد حايعمله حاجة

Anonymous said...

عدى النهار

دعوت لك فى الكعبة بأن يصلح الله حالك .. ويرزقك من أوسع الأبواب .. ويحفظك من كل شرّ

اللهم تقبل دعاء

عدى النهار said...

شريف

حمدالله على السلامة :) ربنا يتقبل منك العٌمرة والدعاء ويحفظك وأهلك من كل سوء

شىء جميل منك يا شريف إنك تذكرتنى وكل أصدقاءك هنا بالدعاء أثناء وجودك بالحرم. إنت إنسان خيّر بمعنى الكلمة.. ربنا يبارك لك ويبارك فيك

someone in life said...

مرحبا
أول مرة أزور مدونتك
كل الفكرة اننا شعب فقد قناعته و لا يحمد الله لديه كل شئ الماء الملوث و الخبز الملئ بالحديد المغذي جدا و الزجاج كأملاح معدنية و ايضا الخضار و الفاكهة المدعمة بأحدث انواع الاسمدة المسرطنة حتي ان اصابنا سرطان و العياذ بالله فسنموت مرضي و لعل هذا يخفف من ذنوبنا يوم الدين
نحن احسن حالا فعلا من شعوب مثل الصومال
و سجوننا افضل قليلا من جوانتينامو و شيوخنا تبيع صكوك الغفران لمن يملك .. احمدوا الله و كفوا عن الشكوى

hamdool said...

all the best inshalla

.:.-=- ELGaZaLy-=-.:. said...

صديقى العزيز جداا عدى النهار

كيف حالك يارب تكون بخير....


بجد براوف على بلال...

بس الكوب اتسرق يا عدى النهار اتسرق بجد

محسن يونس said...

نظيف وعارفينه كبير موظفى الدولة لكن بلال شاب مصرى موجوع ببلده وبيحلم تكون بلد عظيمة على قد اسمها ولو كان فيه مليون بلال شجاع ولا يخاف من العواقب إللى كل المصريين عارفينها وعلى رأسها مباحث أمن الدولة هاتبقى البلد دى عظيمة فعلا تحية لك ولبلال ولشباب مصر إللى كلمة الوطن لسة عندهم كلمة مقدسة مش سيئة السمعة
تقديرى واحترامى لشخصك ولمدونتك
أنا جارك
لى مدونة تهتم بقصص وحكايات الأطفال
أرجو منك زيارتها
http://yonis2222.blogspot.com/

Ahmed Kamal said...

بلال و نظيف ..
بلال و الجون ..
المرة الجاية حاتكون في الجون إن شاء الله ..

بس المهم مانكتفيش كلنا بالتشجيع ، الفريق ناقصه كتير و المنافس غشيم !

حائر في دنيا الله said...

اعتقد السيد نظيف لم يرى في الطالب بلال غير شخص مندس من الفئة المندسة التي تصر ودوما تصر على ان تفسد انجازات الحكومة
وبأمانة اعتقد ان الرجل أصلا لم يمر عليه الموقف كما نتخيل نحن بأنه وقف وحاول ان يفهم وحاجات غريبة عليهم كدا

لك تحياتي
السلام عليكم

عدى النهار said...

someone in life
أهلاً بيكي
هو إحنا بنفول الكلام ده من باب السخرية من أوضاع البلد لكن تعليق نظيف على كلام بلال أكد إنه بيقول نفس كلامنا بس عن قناعة ومن خلال منصبه

hamdool
same to you inshaallah

elgazaly
أهلاً أهلاً حمد الله عالسلامة إنشاء الله تكون بخير

نظيف بأه شايف إن الكوب مليان ومية مية إحنا بس اللي نظرتنا مش تمام

محسن يونس
سلِّمنا خلاص بإن كبار موظفى الدولة مالهومش دعوة بالموجوعين من ولادها. لكن كتير إن كبيرهم يكون بالبجاحة اللي ظهر بها فى لقاء الجامعة
ضرورى طبعاً هازور مدونتك

أحمد كمال
مش عارف حقيقي إذا كان فيه فريق. أعتقد إن بلال كان طهقان زيادة شوية. مؤكد فى ناس طهقانة أكتر منه بس ده بيؤكد شجاعته

أحمد
هو طبعاً إعتبره مندس
ماعتقدش حد تصوّر إن نظيف توقف ولو للحظة وحاول يستوعب كلام بلال وده كان واضح من تعليقه. دى ناس جبِّلة